九式瑜伽及冥想 | 學員R 21日修習日記
#能量瑜伽 #氣功瑜伽 #開啟脈輪 #清理中脈 #平衡身心
21日，每天練習2小時，將很多年看中西醫都處理不了的頑疾都改善。
#長年經痛問題解決了
#長年腳腫消了
#生小朋友後腳抽筋情況改善了
#頸紋平緩了皮膚好了
#情緒平衡了
#身體的氣感強了
#對身體的感覺更敏感
#體驗到與天地接合的安定感
#對自己及身邊人也更慈悲、更接納
#深刻體會何謂平常心
心地導師兼創辦人 Mei Leung | 九式瑜伽及冥想，21日私人授課。
另設九式瑜伽工作坊，亦可自組私人課堂，單對單，小組均可，詳情及報名可參考本頁面或whatsapp 65583604 查詢。
Day 1:
昨日返屋企，分別練左兩次，兩次時間只是10-15分鐘左右，感覺精神，昨晚亦都易入睡，瞓得冧啲（我睡眠質素時常唔好，難入睡同埋易醒）。
下午，做咗一次10分鐘開頭 preparation grounding，然後剛剛再做咗一次二十五分鐘長。
每次做完也是精神，感覺個人平靜，內在空間好似闊啲。
同埋覺得自己隻腳好似白淨咗咁😂
下午時段，身體開始記得5式, 個人反而容易分心，雖然呼吸冇亂，但係個頭腦會諗左其野，久不久要提醒自己返返嚟。
Day 2:
今日早上練習了一小時九式瑜伽和頂輪冥想，下晝也練了一小時，剛剛練習咗20分鐘起式，然後再加頂輪冥想。
今日練嘅時候，右腰有些少冤痛，察覺到嘅時候，就將呼吸帶去那兒放鬆，感覺就會好一點。腳感覺累嘅時候，稍微移動，感覺好一點。做完這些嘅時候，右腰係有啲崩緊，但係又不至於辛苦，個人尚算精神和平靜。
做了三次頂輪冥想，每次也處於差不多睡著，又不算睡著嘅狀態。
Day 3:
今日早上較忙，花了大約20分鐘做起式。黃昏和晚上分別做了一個鐘九式瑜伽和頂輪冥想。
今日可能較頻撲，人有些急，左腳膝蓋痛感較強。期間不斷提醒要慢下來，照顧自己。晚上做冥想中，聽見房中阿囝未能入睡，鼻敏感不停呻鼻涕声，有股怒火升起。好像在於自己就是做得不夠好，很差勁。
然後邀請這個憤怒一起往上攀升，到這個銀河系，看到的這個好似不是憤怒，只是好努力好努力，希望做得很好的自己。
冥想後，心情也平靜下來🙏
Day 4:
今天在課室內外各打了一次九式和做頂輪冥想，晚上回家後也做了一小時。
今日本來有些唔夠瞓，但係感覺上算精神。特別搭巴士keep住腹式呼吸中完眼瞓，起身落車覺得精神。這是我從來不會的，從前搭巴士中完眼訓，我落車嘅時候好容易頭痛頭暈或頸痛，個人處於好迷濛嘅狀態，但今天沒有😄
還有早上在課室的冥想途中，今次個感覺較之前幾次強烈，我突然連結到心經。
晚上再做嘅時候好似個心終於可以飛埋上去。
Day 5:
今日黃昏同晚上各一小時的九式瑜伽練習班+頂輪冥想。
感覺到過去差不多一星期的每天練習兩小時，讓我的內在更平靜、可容空間更大。
特別面對兒子老公而生起嘅情緒，前所未有的快搵返內在嘅平安🙏
Day 6:
打嘅時候覺得雙腳冇咁容易攰，輕鬆些小。感覺比之前有重點支撐身體。
雙手嘅氣咁今日有比昨天強，但通常去到第4式之後，手就沒有十分強的氣感。
這兩天感覺到第4式身體有些少成個身體會輕鬆，身體的氣感還未算感受到。
我這幾天有不同嘅部位輪流痛，昨天頸有啲扯痛，今朝起身就冇，變咗前頸。
整體覺得對腳畀之前鬆了些。
今天兩次，我覺得較之前快能進入狀況。
今晚做的冥想，去到要棲息的宇宙中央嘅時候，好似個心入面變得好像宇宙般廣闊。
Day 7:
比較快感受到內在嘅空間，而唔係只感受到壓迫嘅情緒。
今日阿仔有啲嘢激親我，感到嬲。做好幾下腹式呼吸，開始感受返內在嘅空間同平靜，然後啲情緒亦都快離去。
從前呼吸都好只係會感受到那些情緒，從身體下功夫，整體會有幫助。
昨日下晝見好久不見的朋友，他不知道我正在練氣功，他說我整體感覺實在同精神好多。
Day 8 :
早上練了一次9式，中午和晚上也練了九式和頂輪冥想。
今日較忙碌，可能臨近經期，心情煩躁。
打九式期間也不自覺打快了，要提醒自己集中專注慢落嚟。
身體嘅感覺有些少唔同，特別第三式，眉心中央感受一啲氣落下身體。
冥想嘅時候身體亦似漂浮，久不久先能返回錄音。
Day 9:
早上和下午也練了九式和頂輪冥想。
身體做嘅時候好似比之前鬆，但整體氣感又不算太強烈，主要是雙手感受到。
今日兩次頂輪冥想，個人是在較混沌的狀態。
晚上亦都做咗3A呼吸練習。做完3A先教老公3式，好似做完3A個人狀態會係較清醒。
今日下晝都教個仔（其實過去幾日都有同佢一齊練過）。
今日好感受到自己狀態越定，阿仔就會做得越似樣，越忍受到個身痕。
Day 10:
今日兩小時嘅練習，第二次打九式嘅時候，覺得吸氣入丹田嘅感覺好似比之前順。
打第四五六式嘅時候，感覺整個身體好似鬆，好舒服，好似個心胸都會廣展出去。
頭先剛剛做頂輪冥想嘅時候，剛好有啲啲肝胃痛，覺得個身體好似喺無邊無際要棲息嘅地方得到療癒 。冥想完之後就覺得冇乜嘢，然後變得好肚餓😂
Day 11:
今晚返屋企，再打多次九式。練習七八九式仍未熟練，特別練第8式就察覺自己右邊嘅膊頭、身體、頸鬆極有限，協調較差😅我向來也感到右邊身體整體好唔流動同塞，期待這個禮拜密集練哂九式後右邊會如何。
今晚練習冥想，一路聽住錄音，一路跟住講。拿捏緊個節奏，同埋把聲音同自己內在的定連結。咁樣一路講，好似比之前更加投入，可以投入係上面。
Day 12:
今日早上、下午打足九式，身體感覺係更舒服，特別第9式，氣感強烈，很舒適 。我練第8式嘅時候就手較昨天鬆，開始有些小氣感。
晚上再聽和說了一次冥想練習。
嘗試由丹田發聲，調整坐姿，讓胸口打開，希望這樣會讓自己聲音表達得較firm.
Day 13:
今日上午黃昏同晚上練習了9式和冥想練習。
身體在打完九式後感覺好好多，因為昨晚singing bowl bath後，身體有排毒反應，午飯後食物也好像消化不了 黃昏打完之後個人即刻輕好多。
特別第789式，身體嘅感覺好像有種清洗後嘅流動得更加好。
右邊身仍有些緊，未能鬆。
冥想練習仍在摸索階段，連聽差不多兩星期每日至少兩次後，我開始感覺對我個人有些少轉化。
好似較容易看到每個人只係一個生命，而唔係嗰個係我個仔，我老公，我阿爸我阿媽。好似心情也會較容易平和，當然仍有情緒起嘅時候😂
Day 14:
今日早上同晚上練了九式和冥想。
今日period第一日，向來M來前會看定中醫，食住藥個人先function到，今次專登唔睇，睇下有冇分別。今朝打完個人精神啲，肚有啲痛，之後中午慢慢就冇咁痛。
番到屋企時候，個人覺得好攰好攰，亦都有啲頸痛。
練完九式條頸冇咁痛，過程中身體對於氣嘅感覺流動好似較為強烈。
冥想練習，可以較清晰記起一啲細節🙏
Day 15:
今日練九式嘅時候，身體覺得流動得好些，最開心係經期第二日，好似完全感覺不到嚟經一樣，與昨日完全不同。
冥想嘅時候，自己冇之前咁混沌狀態。
Day 16:
今日嘅九式練習，畀老公提醒，叫我中間嘅氣帶動身體，今日練嘅時候練得順啲。氣感好好強烈些，特別第七八式。
腳都好似冇之前咁累。
冥想練習可記下啲字，做嘅時候清醒好多，投入感會大些。
身體好似會感覺輕飄飄些。
Day 17:
半夜同我阿爸入咗醫院，爸爸昨晚半夜搭的士去瑪嘉烈會合佢嘅時候，我感到好感恩Heidi 同你。
過去兩星期嘅密集式練習，讓我個人穩定好多，我未知道阿爸情況之前，剛剛做完meditation，好似喺宇宙嗰度會合選擇今世來呢度嘅原原本本嘅我。縱使我係的士上情緒翻滾，好多複雜嘅情緒湧現，同時都可以搵到內在嘅平安去穩定、安撫自己🙏
昨晚睡眠不足，今日每次練習九式，個人定返，感覺有返啲氣喺身體，不會有種好迷茫嘅狀態。
冥練習可以較清醒係宇宙中心漂浮，與最原本嘅自己一起，個心更加安定🙏
Day 18:
一早阿爸出咗狀況，要同佢再去醫院，所以喺醫院等了又等，用了大半天。
身體較疲累，打完九式,個人稍稍有返精神,冇咁飄嘅感覺。
實在太攰，冇聽錄音。自己坐喺度做頂輪冥想，自己guided自己，好似反而喺個宇宙中心度飄浮融為一體嘅感覺非常之大，直頭唔想返落嚟咁。
嗰種感覺係好似同其他物件都係一體感，呢個狀態唔係維持好久，但係都有幾刻咁嘅感覺，唔知道應該點樣用文字去形容。
完後，好似身體反而實在些🙏
Day 19:
食咗一陣間晚飯，突然之間個人好似攰到瞓低咁（以前都曾經試過），但食咗幾啖飯，瞓低就會覺得唔舒服，企喺度又無乜力。忽然想起，可以坐係度做起式同埋第一式。
坐低做完起式和第一式後，身體漸漸覺得有返啲氣力，跟住企起身打埋其他7式。
打完後個人精神好多, 即刻可以洗埋碗晾埋衫😂
之後自己再做meditation做嘅時候，飛上太空做完嘅時候感覺好似成個人會更加接通天地咁。
今日開始體會，打9式前做樹根grounding再加之後飛上宇宙中心嗰種天與地連貫性，感覺好似更感受同大地和宇宙嘅連結。
身體會覺得好似更多更加多力量。
Day 20:
打九式嘅時候，覺得個心同人穩定，覺得好暢通嘅感覺。
頂輪冥想感覺個身更加輕飄飄，覺得個人更有信心。
Day 21:
🎉🎉🎉🎉
我第一次可以做一樣有益身心嘅嘢堅持21日😭
我發現呢三個星期打九式，同埋冥想，身體既變令我係物質層面都理解左咩係氣，以前唔明。
我天生頸紋好深，做美容保養都冇用，但呢排發現條頸既皮膚好似冇甘緊，頸紋淡左～我真係完全冇諗到。
同埋，我自從生左細路之後，久不久都夜晚腳抽筋，抽到要起身落地先鬆到. 最近少左抽筋，而且抽既時候都輕微好多！
我雙腳腳跟長期易腫，最近練九式，腳腫都改善左好多。
我真係覺得九式好好！
練習嘅時候，就算仍有不夠專心嘅時候，會快好多接納呢個情況，以平常心慢慢穩定自己。我覺得因為冥想時多了連接宇宙、大地嘅大愛、慈悲、支持，所以對自己也更慈悲、更接納，更能深刻體會何謂平常心。
謝謝你過去21天的陪伴、聆聽及支持💕💕💕
